He mihi

Ko te kāhui o Matariki he huihuingā whetū ki te rangi. Ka tū ki te tahatū o te rangi i te hōtoke kia mōhio pai ai te tangata kua tīmata Te Mātahi o te Tau. E ai ki ētahi, e iwa ngā whetū kei te kāhui, ā, ka hāngai ia whetū ki tētahi wāhanga o te taiao Māori. Ko Matariki tonu te ingoa o te whetū nui e noho ana ki te poka pū o te rōpū, ko ia te whaea o ngā whetū e karapoti nei i a ia. Ko te wāhi ki a Matariki whetū ko te oranga o te tangata, ka whakanuia te tūhonotanga o te taiao ki te oranga o te tangata mā roto mai i a Matariki.

Kua tīpakohia a Matariki hei mahere ārahi i tēnei rīpoata. Ka kōrerohia ia whetū me tana hononga ki te taiao kei ngā upoko o te tuhinga nei. Ka tirohia anō hoki te hua o ngā wāhanga katoa o te taiao ki te oranga o te tangata, me te tūhonohonotanga o ngā tangata katoa ki tō tātau taiao.

Ki tā te Māori titiro ko te tangata ko te taiao, ko te taiao ko te tangata, tē taea te whakawehe. Koinei i tīkina ai ko Matariki hei tūāpapa mō tēnei rīpoata. Kia eke ai tātau ki te kōrero, Matariki hunga nui, Matariki ahunga nui, Matariki manako nui.

Professor Rangi Matamua
Massey University
Chief Advisor Matariki and Mātauranga Māori